首輪影院

我同大人久不久便會在星期六或星期日到樓下商場的戲院睇早場。

睇早場有幾個好處：
1. 價錢平：平時一張飛50-60元，早場一般半價，但套戲都是播足；
2. 人又少：一般來說，無論套戲是否好看，早場人數都未必多。會那麼早去睇戲的，十之八九是老夫老妻或偷情男女（嘻嘻，費事爆咁多料喇）。如果連早場都多人，很多時我們已知必定旺爆（例如最近的蜘蛛俠3，早場都爆）；
3. 揀好位：大人睇戲要求坐好位，所以睇早場最好，因最容易揀到好位。

由於又要睇早輪猛片，又要睇早場，所以無咩口碑下，我們便要好有效率去揀戲來睇，正宗睇戲先鋒。咁點樣有系統去揀戲睇呢？
1. 時間值：無論中西片，我地盡量會避開少於100分鐘的電影。我的理論是，如果套戲是咁好，監製和道演無理由願意將160分鐘（一般戲會分16組拍，而每組約10分鐘）的戲剪多於一半（但現時部份低製作費的戲，可能只得12組或更少，因為很多錢洗了在演員身上，可悲！）；
2. 製作值：通常一些大製作的片，就算橋段一般，但比錢入場，至少有些靚景或大場面如爆破或電腦特技等，令人確得入戲院睇點都好過在家睇，這樣先至會吸引到入場。西片往往在這方面佔優，所以我地通常都是睇西片；
3. 故事值：這方面其實幾睇個人喜好，有些人喜歡看鬼片、有些人喜歡看科幻片，亦可能有人喜歡看愛情小品。我和大人甚少入戲院睇鬼片，多數都是睇愛情戲。那些文藝戲呢？實在不是我那杯茶。我呢？就較喜歡睇超人片或懸擬片；
4. 幕後值：老實說，現在揀戲睇，我睇製作班底多於幕前演出的人。不單單指導演，並要看看監製是誰、編劇是誰等，所以你話劉偉強呀、彭氏兄弟呀等，都可能值較高價錢就是咁解。另外，睇班底，有時真係幾睇當時得令和新派的感覺，能夠帶出嶄新感覺或觀點給觀眾是十分重要的原素。相對上，唔好話吳宇森、王晶或張藝謀等差了，只是唔同時代，大家要求的感覺不一樣。稍為走漏眼，是方晴（唔知男定女），因我發覺我睇的港產片，很多都有他/她份，唔知是他/她產量多定真係咁堅，好戲緊有佢份？
5. 人物值：即俗稱卡士Cast。對卡士這回事，我就一向都唔係好受，亦最怕那些大卡士、大製作的戲，好似好重使命感和責任，所以我對卡士未必好有要求。相反，唔知大家有無這樣的感覺，就是去睇戲，如果發現一個新鮮人，做得幾好，會份外覺得套戲好睇。所以，那些戲如果有老戲骨撘新面孔，會份外吸引。

其實根據以上五點，我地揀到的戲通常都可以接受，大家日後都可以參考參考。