有容乃大

在辦公室做過幾年的新人，大都會睇不過在辦公室內有一些擦鞋仔、是非精、萬人迷、麻煩友或黑面神等。

有時候，同事會這樣問我：「點解找這個人去負責這個項目？難道你唔知佢又擦鞋、又亂點一通、仲成日溝女同事！？」

老實說，你同得我講，自然覺得我都不是愚昧的管理人，試問我又有咩可能唔知你所講的事（因我都會觀察一位同事一段時期，先至將任務交給他）。然而，大家要知道，管理人唔需要係道德家，只要所做的事不是違規，而所負責的人又能達成任務，任何有能力之人也可以一起工作。

當然，如果找到個同事又忠心、又有很高的道德標準的話，辦事能力又高，那是公司和我的福氣。可是，我亦不可能將所有任務交給一個人，唔通想做死佢咩？所以，管理人一定要有一定的能力與不同人合作。

相反，那些有獨立思想、自命有道德的人，卻經常破壞規矩、不聽指示、喜歡以自己標準去行事的人，反而多數會被我放棄，因為我永遠對他們都不放心，不知他們幾時作出自己的獨立判斷、道德思想，而隨時甩底或消失，為免有任何失誤，我多數都避之則吉。

幸運的我，所處的辦公室，以我的標準來說未算太多古怪及不懂事之人，所以平日都未太需要費神去解決這些人事，又或者一早已經被我解決左，嘻嘻。